Ejemplos con marabillo

* ¡O Dios, señor criador et complido!, ¡cómo me marabillo porque pusiestes vuestra semejança en omne nesçio, ca cuando fabla, yerra, cuando calla, muestra su mengua, cuando es rico, es orgulloso, cuando pobre, non lo preçia nada, si obra, non fará obra de recabdo, si está de vagar, pierde lo que ha, es sobervio sobre el que ha poder, et vénçesse por el que más puede, es ligero de forçar et malo de rogar, conbídase de grado, conbida mal et tarde, demanda quequier et con porfía, da tarde et amidos et con façerio, non se vergüença por sus yerros, et aborreçe quil’ castiga, el su falago es enojoso, la su saña, con denuesto, es sospechoso et de mala poridat, espántasse sin razón, toma esfuerço ó non deve, do cuida fazer plazer, faze pesar, es flaco en los vienes et reçio en los males: non se castiga por cosa quel’ digan contra su voluntad, en grave día nasçió quien oyó el su castigo, si lo aconpañan non lo gradesçe et fázelos lazdrar, nunca conçierta en dicho nin en fecho, nin yerra en lo quel’ non cumple, lo quel dize non se entiende, nin entiende lo quel’ dizen, siempre anda desabenido de su compaña, non se mesura en sus plazeres, nin cata su mantenençia, non quiere perdonar et quiere quel’ perdonen, es escarnidor, et él es el escarnido, querría engañar si lo sopiesse fazer, de todo lo que se pagaría tiene que es lo mejor, aunque lo non sea, querría folgar et que lazdrassen los otros. ¿qué diré más? En los fechos et en los dichos, en todo yerra, et lo demás, en su vista paresçe que es nesçio, et muchos son nescios que non lo parescen, mas el que lo paresçe nunca yerra de lo seer.